الكتير منا
ذهب لدكاترة رجيم وكتير مننا أكيد سمع هذة
المقولة (حضرتك عندك الحرق ضعيف) وطبعا دى
مقولة مشهورة جداً جداً ورغم انك عملت كل التحاليل وانك لا تعانى من خمول الغدة او
لا تعانى من اى انيميا او لا تتناول ادوية بها كورتيزون او اى ادوية تسبب زيادة
الوزن الا انه يصر على ان حرقك ضعيف ودى بتكون بداية بيزنس كبير, اكيد مفهمتش
كلامى وعلشان كده هوضحلك بالظبط خطة عمل كتير اوى من دكاترة البيزنس والى بيشغلو
بعض او بيشغلو مراكز التخسيس, بص ياسيدى اولا لازم تعرف شئ مهم جداً جداً ماهو
المتحكم فى حرق الجسم ؟؟؟!!!!
حركة الاجهزة
الداخلية زى القلب والكلى والكبد وكل اجهزة الجسم تحتاج طاقة لتشغيلها وبالتالى جزء
من الاكل الى انت بتاكله بيتحرق عن طريق تلك الاجهزة وعلشان كده لو ما أكلناش
بنموت لان مفيش مصدر طاقة لتلك الاجهزة الداخلية , تعالى بقى نشوف بقى باقى الحرق
متوزع على ايه ؟؟؟!!!! باقى الحرق متوزع على جهازك الحركي والذي يحتوى على العضلات
بداية من حركة الفم الى حركة الاقدام واليدين كل جزء فى جسمك يتحرك بيحتاج طاقة
وكلما زادت قوة العضلة كلما زاد معدل الحرق علشان كده ده السر ان الرجال بيخسو
اسرع من السيدات لأن كتلتهم العضلية اكبر فى بعض الاحيان بحكم عملهم ولكن فى سيدات كثيرين ايضاً عندهم كتلة عضلية
قوية وده بيساعد كتير فى الحركة وبالتالى يرفع من معدل الحرقولذلك نفهم مما
هو سبق انك تقدر بكل بساطة تزود من مجهودك البدني لزيادة الحركة وبالتالى زيادة
الحرق وكلما كانت الرياضة متوازنه كالمشي والتمارين التى تبنى العضلة بشكل متناسق
كلما كان معدل حرقك اقوى وعلشان كده لازم تتعلم شئ ان بناء جسم قوى من خلال نظام
صحى مع ممارسة الرياضة الخفيفة بدون رفع اثقال هيجعل حرقك قوى طوال حياتك , طيب
مقولتليش برضو الدكتور ليه اوقات بيقولى كده؟؟!!!! بص ياسيدى كتير من الدكاترة
بتلعب معاك لعبة وبتستغل احتياجك انك تخس وهو عندما تذهب للطبيب وتقوله عايز اخس
بيديلك نظام اكل تمشي عليه وطبعا علشان انت معندكش اى فكر عن الانظمة وثقتك انه
دكتور بتبدأ وانت مطمئنوتلاقى الدكتور
بيديلك نظام بيخلى الوزن يثبت بعد فترة وليكن لو محتاج تخس مثلا 30 كيلو تلاقى
نفسك خسيت 10 كيلو والوزن بيثبت ومش بيتحرك خالص ومهما تعمل وتقلل اكل مفيش فايدة
ومهما تلعب رياضة مفيش امل فا يبدأ يدخل عليك بالشغل التقيل بقى ويقولك فى دواء
انا جايبة من امريكا جامد جدا ورخيص بالنسبة لمفعوله ده بـ 400 جنية أو بص فى كورس
حقن لزيادة الحرق بـ 900 جنية أو فى جهاز حرق الدهون بالتبريد لأ بالليزر لأ
بالبتنجان واي كلام وانت يا عينى ولا فاهم حاجه وتفضل تسأل نفسك طالما خسيت معاه
10 كيلو يبقى دكتور بيفهم يبقى اكيد مش هيضرنى وتبدأ سيادتك تدفع وتلاقى نفسك داخل
فى 5000 او 6000 جنيه وهو يبدأ يلعب معاك تانى
بالانظمة ويوهمك انك بتخس بالعلاج و ده حصل فعلا لدرجة ان فى دكاترة كانو بيستخدمو
مياه من الحنفية على انها حقن حارقة للدهون وطبعا نتيجة العك ده تلاقى نفسك
الموضوع طول والدكتور شغال بيسحب منك فلوس انت بتبدأ تحس انك بيتنصب عليك وتلاقى
نفسك جربت جميع الاجهزة وبرضو مفيش فايدة ووقتها بتسيب الدكتور , طبعا من الحقائق
الى حدثت لأحد الاعضاء ان الدكتور اعطى له برنامج غذائي خالى تماماً من النشويات
لمدة 3 شهور خس خلالهم 13 كيلو وتوقف الحرق تماماً, طبعا مفيش اى نظام غذائي صحى
ممكن توقف فيه النشويات طوال 3 شهور لأن الجسم طبيعى هيوقف حرق لأن النشويات هى
المحرك للجسم ولو قطعناها لفترة
طويلة الجسم هيقلل حرقة بشكل كبير يعنى اخرك 3 او 4 ايام بشكل متبادل مثل نظامنا
الصحى كده والجديد دلوقتى
انك تدخل توزن نفسك فى اي صيديلية تجد الطبيب بيقولك انت بتخس ؟؟ طبعا انت بترد
وكلك ثقة ومبتسم أه بخس , طبعا هيقولك انت بتخس كام كيلو فى الشهر ؟؟ انت تقوله
حوالى 5 كيلو تقريباً , يقولك ياااه ده حرقك ضعيف اوى لازم تاخد دواء يزود الحرق
شوية , ويبدأ يعرض عليك اى ادوية والغريب ان منها مثلا (أورلى) بالظبط كما حدث مع
بعض الاعضاء وليه بقول غريب ؟؟؟ علشان الاورلى مالوش اى علاقة بزيادة الحرق ده فقط
بينزل 30 فى المائة من دهون الوجبة واحنا اساساً بناكل اكل صحى يعنى مالوش اى
لازمة , بس هو طبعا بيعمل شغل وعايز يكسب , ولازم تفهم ان ادوية التخسيس كلها مضرة
جدا جدا , منها مايسبب اكتئاب وزهايمر مثل الادوية التى تعمل على مركز الشبع
, وادوية اخرى
تعمل على رفع ضغط الدم والذى كاد ان يتسبب فى تدمير عينى احد الاعضاء واصابتها
بالعمى نتيجة ارتفاع ضغط الدم , أو بعض الادوية التى تلعب فى هرمونات الحرق مما
تسبب اضطراب دائم فى الهرمونات وتسبب جلطات
أو من يوصف بعض الاعشاب التى تسبب حالة من الاسهال المستمر والتى يترتب
عليها بعد ذلك امراض كالانيمية وغيرها من التهابات المعدة , واعتقد ان كتير
منكم قابل كتير من هؤلاء التجار , لكن مش معنى كدة ان جميع الدكاترة سيئين لا
طبعاً فى دكاترة كتير محترمين وفعلا عندهم ضمير وبيساعدوك بجد بشكل صحى ,ولو سألتهم عن
الاجهزة فا بيقولك ان الاجهزة مثل الكفتيشن او الليزر بتستخدم فقط فى حالات معينة
لو انتهينا مثلا من الدايت وعندنا حتة صغيرة اوي مثلا فى بطننا محتاجه تتشد او حتة
بسيطة تجميلية لكن
مايحدث الان من استخدام اجهزة فى التخسيس كله لايفيد لأنك لم تعالج المصدر الاساسي
,رسالة لكل انسان يدمر حياة انسان لكي يحصل منه على اموال , صدقنى والله والله
هنخرج من هذة الدنيا بلا جيوب فقط سيبقى الخير الذى فعلناه فى هذة الدنيا وبشكر كل
طبيب شريف يساعد كل مريض بكل اخلاص وصدق لأن مازال هناك الكثير منهم يعملون بضمير حى
ويساعدون الناس فى تغيير حياتهم للأفضل