مواقف وجعتك اوي بسبب السمنة
مواقف وجعتك
سألناكم في الكومينيتي سؤال و قولنالك السمنة كانت وجع ليك في ايه احكيلنا و الحقيقة لقينا تعليقات كثيرة اخترنا منهم ١٣ تعليق يكونوا محور الحلقة النهاردة .
شاهد الفيديو
اتكلمنا امبارح عن السمنة و انها تسبب أمراض و انه فيه لحظة في حياتك فارقة لما تمسك قلبك و تحس بوجع وتلاقي انك ضيعت نفسك في لحظة ..الألم إلي أنت هتحسه هتلاقي ناس كثيرة حواليك يوقفوا جنبك في محنتك بس مبتطولش تساندك يوم اثنين شهر شهرين و أكثر من كده
يزهقوا و ينسحبوا واحد ورا التاني وتلاقي نفسك بقيت لوحدك مش قادر حتى تقوم بأقل حاجة لنفسك و الوجع ده هيكون أكثر من وجع المرض نفسه مش بقول كده عشان أضايقك لكن عشان عايزك تعيش و تموت و انت واقف على رجليك و ما تحتاجش لحد ابدا يا لا نشوف تعليقاتكم على سؤالي:
- و اول كومنت من مودر بتقول لما الناس تقول انت سمنتي و وزنك زايد انت مريضة و لما تخسي تقولك انت وشك بقا وحش انت خسيتي اوي الناس ملهاش حل لكن اهم حاجة تكون راضي عن نفسك م.مصطفى: فعلا اهم حاجة هي الرضا عن النفس مهما كان شكلك اهم حاجة انك تخس بشكل صحي و سليم
- أمنية بتقول انا رجليا كانت بتوجعني من اقل مجهود و ظهري كمان لكن دلوقتي الحمد لله من اول ما بدأت معاكم اتغيرت و بقيت امشي مسافات طويلة من غير الم ربنا يبارك فيك يا هندسة /م.مصطفى: فعلا الرشاقة نعمة و صحة انا كنت لما امشي مائة متر احس بجسمي كله بيوجعني و الحمد لله بقيت امشي مسافات ممكن تتخطى ٢٥ كيلو و بدون تعب او وجع
- جوجو بتقول كنا في اليابان و كنت اعاني من الدوالي كشفت هناك و كان المفروض اشتري شراب زي الكلون ضاغط فلما ياخذوا المقاسات المازورة كانت أصغر من حجمي و كان موقف محرج لان الممرضة خذت المقاس بصعوبة ربنا يقوينا و نتخلص من السجن ده/م.مصطفى: حقيقي بنتعرض لبعض المواقف بتجرحنا جدا
-زهرة الأمل بتقول السمنة أكثر حاجة وجعتني لأني معرفتش معنى الطفولة بسببها غير الكلام الي بيجوع القلب و التريقة انا من عمر ٧ سنين بعاني من السمنة عملت دايت كثير اخس و ارجع و تعبت نفسيا و جسديا و قلّت ثقتي بنفسي حرام عليكم يا ناس قولوا كلمة حلوة للي قدامكم مش تجرحوه سيبوا الناس في حالها بالله عليكم ادعولي اكمل للآخر شكرا ليك يا بشمهندس/ م.مصطفى:ده وجع لأن الناس مش سايباك في حالك طالما مش بتساعد حط لسانك في بقك احسن لأنك ممكن توصّل هذا الشخص انه يعمل حاجة في نفسه
- رنا ريم بتقول تعليق زوجي ان شكلي غريب و كان بيهزر دايما مع الاولاد و يقولهم ايه رأيكم نجيب ماما غيرها و الكلام ده كان يضايقني/م.مصطفى:جرح الأزواج لزوجاتهم كثير فنصيحة لكل زوج رفقا بيهم.
- فطيمة: نصيحتي لكل الناس اهتموا بصحتكم لأنه في هذا الزمان كل واحد مشغول حتى عن نفسه فما بالك يهتم بيك
- آيات بتقول و انا طفلة المسؤول عن الألعاب رفض يدخلني بيت الكور ألعب مع باقي أصحابي و قال تخينة ممكن تخرم اللعبة/ م.مصطفى: معندناش حتى ثقافة اننا نحافظ على الأطفال فاكرينهم مبيحسوش
- همس الحياة: مواقف كثيرة بتوجعني لما امشي و احس بوجع الركبة لما اشوف زوجي ينكسف يطلع معايا لما اشوف نظرات بنتي و هي مش عاجبها جسمي و التريقة من اهل زوجي لما آجي أنام احس بثقل جسمي بيوجعني لما أبص في المرايا على شكلي إلي كبر أوي لما أطلع السوق و أشوف كل البنات يلبسوا الي نفسهم فيه و انا لا يا رب أرحنا و إرحمنا من هذا الوجع
- حنان بتقول سواق الميكروباص قفل الباب و مرضاش يخليني اركب و قال خلاص العربية كملت و أنا شايفاها فاضية و فضلت واقفة مش قادرة أنطق و لا أمشي و بقول يا أرض إنشقي و ابلعيني و لما جه ناس عادية فتح الباب و ركبهم/ م.مصطفى: منتهى قلة الذوق و قلة الأدب و الوجع كل واحد يأذي حد يتردله اضعاف .
- أكثر حاجة إني مش بعرف ألبس لبسي بتاع زمان و كمان لما زوجي يحرجني من باب الهزار من وجهة نظره و يقولي كرشك أكبر من كرشي / م.مصطفى: خسي بقا و قوليله كرشي راح و كرشك ازاي هيروح
- مومو بتقول أعاني من إنزلاق غضروفي على مستوى الرقبة و أسفل الضهر و السمنة زادت الطين بلة لم أكن أستطيع حمل اولادي و أعاني عند الإرضاع و عملي أتعبني أكثر لكن بعد أن فطمت إبني الثالث في رمضان قررت أفطم نفسي من السمنة و انا معاكم فقدت ١٠ كيلو و لازلت مستمرة هكون البطلةةبإذن الله و بفضل الأستاذ مصطفى
- منار بتقول لما أروح أشتري لبس بكسّل و بقول لما أخس حاجات كثيرة تعجبني بس السمنة عاملة حاجز بيني وبين أي حاجة بحبها لا لا للسمنة نعم نعم للرشاقة أنا خسيت ١١ كيلو في شهر و مكملة بإذن الله
- بنت شمر بتقول لما صديقتي قالت إنت مين هيرضى فيك بشكلك ده مع إني مكنتش سمينة سمنة بشعة لكن سبحان الله الدنيا دوارة أنا خسيت و هي صارت فيل في كم شهر بس لا تعيب على أخيك يعافيه ربي و يبتليك / م.مصطفى: فإنت متقوليش عليها كده ايضا احنا أرقى من ذلك يعني حتى لما نخس و نحقق هدفنا هنفضل أرقى من أي حد يمكن يكون جرحنا بالعكس الناس الي جرحتنا نمد إيدينا ليهم و نقولهم يا لا عشان توصلوا لهدفكم زينا و تتمتعوا بالرشاقة عشان خاطر ربنا يرضى عنا و يعيننا و يخلينا محافظين على الي وصلناله خلي نفوسنا صافية آه مبننساش الوجع لكن خليه دافع لينا إننا نستمر بإذن الله